Ji ber ku disêwirim, ez ne ez im..
Ji ber ku ez disêwirim..
Disêwirim...
Ji ber berî ew min berdin rojê..
min xwe berda sêwirandinên xwe..
( Lêolo )
Di 7/03/2018an de te ev fîlmê Kanadayî temaşe kir û van rêzikên li jor te ji wir girt. Filmeke têra xwe kûr bû bi rastî. Niha tu yê bibêjî vî Darayo ji ber çi ji min re qala van çîrokan dike. Temam rast e ji bo îroya te dibe ku weke çîrokê ji te re hatibe lê di dema ku ez vê nivîsê dinivîsim de ev film xwedî tesîreke derûnî ye di esasê xwe de. Piştî çend deqê dinê wê bibe 'Roja cîhanî ya jinan'. Ev îro bû mehek û çend roje min li dayîka xwe ne geriyaye.
Weke ku ez bêriya wê dikim bêriya tu berdilka xwe nakim. Ji min na xeyide ez dizanim. Pênç salan jî ez lê negerim neçim cem wê, dema ez çûm min xwe da ber çokên wê dê dîsa min efû bike. Weke ku tu tişt nebûbe dê dîsa porê min şeh bike, ji min re kala xwe û nexweşînên xwe bike. Ew dayîka te ya ku hê 40 saliya xwe de ji ber derd û keserên ku we birayên xwe dayê pîr bû ye. Niha tê bîra te lo Darayo. Xwezî niha ez li cem wê bûma û min herdu destên wê biramûsanda.
Jiyan zehmet e
Ez niha li Stenbolê me. Bi rastî ev bû çend roje ez li Stenbolê me. Betal im û kar nîne ku ez bixwebitim jî. Dilê min heye ez ji bilî rojnamegeriyê karekî berovajî beşa xwe bikim. Ka em binêrin eger destpê kir ji xwe ez ê ji te re di nameyeke din de bibêjim. Ji ber ku ez li Stenbolê bûm û net û derfet nînbûn min bloga xwe jî hinek îhmal kir ji ber vê yekê jî ez lêborîna xwe dixwazim ji te û ji xwînerên blogê. Ha mizgîniya xwe dixwazim ji te min ji bo bloga te hesabekî twitterê vekir. Hûn dikarin wî hisabî jî bişopînin. @bandinidara .
Min bêriya bawo kiriye
Wa Darayo tu dizanî ev 2 mehe bavê te qet li te ne pirsiye. Xwezî rokê, royeka tenê telefonekê bikira û bigota 'Kurê min'. Tu nizanî min çiqas bêriya wî kiriye. Lê ez nikarim lê bigerim. Nikarim harim ber lingên wî û lêborîna xwe jê bixwazim. Ji ber ku ta niha min tim serî lê tewandiye û nebûme sedema gewriya wî geş bibe. Ev mijarên taybet in zaf naxwazim qal bikim lê ji bo tu hay ji van royan hebî weke nîşeyekî dinivîsim.
Çend şîret
Ji bîr neke. Ji keçikên xwe re tim nazik, ji lawên xwe re jî tim hurmetdar be da ku ew jî rêz û nimayîşê bo te nîşan bidin. Tu nikaribî alîkariya wan bikî jî piştgirî bide wan. Gotineke te ya erênî wê karê wan li ber çavên wan bike zêr. Niha bi xatirê te. Ez ê di demeke guncav de dîsa ji te re biaxivim.
07/03/2018
Eyupsultan/Stenbol
Yorumlar
Yorum Gönder